Helgemesse

Frå Wikipedia – det frie oppslagsverket

Helgemesse eller alle helgens dag er ei kristen høgtid feira om hausten eller våren. I kyrkjer med helgenar minner ein alle helgenane ein ikkje kjenner namnet på denne dagen. I desse og andre tradisjonar er det også vanleg å minnast vanlege døde. Helgemesse vert i Den norske kyrkja feira første søndagen i november.

[endre] Minnedag

Helgemesse er opphaveleg ein minnedag for alle helgenar. Pave Gregor IV la feiringa av dagen til 1. november.

I Den norske kyrkja er dagen offisielt rekna som ein minnefest for alle dei som er gått føre – helgenar, martyrar og familiemedlemer, ein dag som vert feira for dei som lever.

Der er mange tradisjonar knytta til denne dagen i norske kyrkjer. Det er vanleg å tenne lys på gravene, i nokre kyrkjer ringer dei med klokkene. I mange kyrkjelyder minnest dei som er gått bort siste året denne dagen. I andre kyrkjelyder er denne minnemarkeringa i nyare tid flytta til nyårsaftan.

Det er skrive eigne salmar for Helgemesse, ein typisk helgemessesalme er Brorson sin salme Den store, kvite flokk, å sjå, nr 245 i Norsk Salmebok.

[endre] Dato

Tradisjonelt har 1. november vore dagen for Helgemesse, og i katolske og anglikanske tradisjonar er det vanleg å feira dagen fast denne datoen. I Den ortodokse kyrkja feirer ein allehelgensdag første søndag etter pinse.

Etter Kristian den femtes norske lov var Alle Helgens Dag heilagdag. Etter Festdagsreduksjonen i 1770 vart feiringa av dagen i Danmark og Noreg flytta til første søndagen i november. I Sverige er Alla helgons dag laurdagen før første søndagen i november.